កំពង់ចាម: អភិបាលខេត្តកំពង់ចាមលោក អ៊ុន ចាន់ដា បានដឹកនាំការត្រួតពិនិត្យមន្ទីរពេទ្យខេត្តកំពង់ចាមដើម្បីរៀបចំមន្ទីរពិសោធន៍វិភាគសំណាកជំងឺកូវីដ-១៩។ បច្ចុប្បន្នមន្ទីរពេទ្យខេត្តកំពង់ចាមកំពុងប្រើប្រាស់ម៉ាស៊ីនកម្រិតមធ្យមដើម្បីពិនិត្យសំណាកមេរោគកូវីដ-១៩ នៅក្នុងខេត្តដែលអាចពិនិត្យសំណាកបាន ១០០ករណីក្នុងមួយថ្ងៃ។ តាមរយៈការប្រើប្រាស់ម៉ាស៊ីនកម្រិតមធ្យម សំណាកទាំងអស់នឹងត្រូវយកមកពិនិត្យម្តងទៀតនៅវិទ្យាស្ថានប៉ាស្ទ័រ និងវិទ្យាស្ថានសុខភាពសាធារណៈមុនពេលលទ្ធផលត្រូវបានចេញផ្សាយ។

ប្រធានមន្ទីរពេទ្យខេត្តកំពង់ចាមលោក យិន ស៊ីណាត មានប្រសាសន៍ថាតាមរយៈគម្រោងរៀបចំមន្ទីរពិសោធន៍កូវីដ-១៩ ខាងមន្ទីរពេទ្យអាចផ្តល់លទ្ធផលភ្លាមៗនៃជម្ងឺកូវីដ-១៩ ដោយមិនបាច់បញ្ជូនទៅពិនិត្យម្តងទៀតនៅវិទ្យាស្ថានប៉ាស្ទ័រឡើយ។ ក្រៅពីគម្រោងអភិវឌ្ឍមន្ទីរពិសោធន៍កូវីដ-១៩ រដ្ឋបាលខេត្តក៏បានរៀបតំឡើងម៉ាស៊ីនអុកស៊ីសែនដែលក្នុងមួយម៉ោងអាចផលិតបានចំនួន ១០បំពង់ដែលជាជំនួយពីលោក ហ៊ុន ម៉ានិត៕